Áirítear le foréigean baile - ach níl sé teoranta do - aon ghníomh nó bagairt d'fhoréigean fisiciúil, gnéasach nó mothúchánach, nó smacht comhéigneach. Tugtar drochíde sa teaghlach air sin go minic freisin. D'fhéadfadh na gníomhartha nó na bagairtí sin a bheith i do choinne nó i gcoinne duine de do theaghlach. Áirítear le foréigean baile freisin gníomhartha agus bagairtí airgeadais nó digiteacha. Is éard atá i gceist leis sin ná nuair a úsáideann duine airgead nó ciapadh ar líne chun smacht a bheith acu ar dhuine eile.
D'fhéadfadh na gníomhartha nó bagairtí foréigneacha sin a bheith á ndéanamh ag duine a bhfuil gaol fola nó uchtála aige/aici leat, amhail tuismitheoirí, mic agus iníonacha fásta, agus seantuismitheoirí. Is féidir le daoine a mheasann an chúirt a bheith mar dhlúthpháirtí duit na gníomhartha agus na bagairtí sin a dhéanamh freisin. Ina measc sin tá céilí, páirtithe sibhialta, páirtithe a chónaíonn lena chéile, tuismitheoir eile do linbh, agus dlúthpháirtithe neamhphósta, is cuma má tá caidreamh eatarthu faoi láthair, nó má raibh caidreamh eatarthu san am a chuaigh thart. Ní chumhdaítear achrainn idir comharsana, tionóntaí, nó comrádaithe seomra leis an dlí um fhoréigean baile.
D'fhéadfá a bheith i dteideal iarratas a dhéanamh ar ordú um fhoréigean baile nó ar mheascán d'orduithe. Tugann roinnt orduithe ordú do dhuine stop a chur le tuilleadh gníomhartha nó bagairtí foréigneacha a dhéanamh i do choinne. Is féidir le horduithe eile ordú a thabhairt don duine sin an teach a fhágáil. Eisíonn breitheamh orduithe um fhoréigean baile sa chúirt. Tuilleadh eolais maidir le horduithe cúirte a thuiscint thíos.
An bhfuil tú i mbaol faoi láthair?
Má tá tú i mbaol láithreach nó má bhraitheann tú nach bhfuil tú féin agus/nó do leanaí sábháilte, déan teagmháil leis na Gardaí láithreach trí ghlaoch a chur ar 999 nó 112.
