Má tá airgead le híoc agat le duine, le grúpa daoine nó le cuideachta, tugtar féichiúnaí ort.
Tugtar creidiúnaí ar dhuine, ar ghrúpa daoine, nó ar chuideachta a bhfuil airgead dlite dóibh uait.
Sa chás go bhfuil fiachas fós gan íoc, tá creidiúnaithe i dteideal éileamh fiachais a dhéanamh.
Nóta: Ní féidir fiach a éileamh tríd an Nós Imeachta um Éilimh Bheaga. Chun tuilleadh eolais a fháil faoin Nós Imeachta um Éilimh Bheaga, féach ar ár leathanach faoi Éilimh Bheaga. Má theastaíonn eolas uait maidir le Dócmhainneacht Phearsanta, féach ar ár leathanach Dócmhainneacht Phearsanta.
Conas is Féidir Fiachas Neamhíoctha a Réiteach?
Tá dhá bhealach ann chun fiachas neamhíoctha a réiteach:
Fiach neamhíoctha a réiteach gan dul chun na cúirte
Go ginearálta, tá sé níos tapúla agus níos saoire d'fhéichiúnaithe agus do chreidiúnaithe déileáil go díreach lena chéile faoi fhiachas neamhíoctha, trí theacht ar chomhaontú atá inacmhainne agus inbhuanaithe, gan dul chun na cúirte.
D’fhéadfadh comhaontú arna shíniú ag na daoine lena mbaineann, nó comhaontú idirghabhála, a bheith san áireamh leis sin, agus d’fhéadfadh an dá chomhaontú sin am agus costas a shábháil duit.
B’fhéidir gur mhaith leat smaoineamh ar theagmháil a dhéanamh le duine chun comhairle a fháil maidir le hidirghabháil, nó comhairle a lorg ó sheirbhísí tacaíochta ar fud na tíre.
Fiachas neamhíoctha a réiteach trí na cúirteanna
Mura dtagtar ar chomhaontú, féadfar imeachtaí dlíthiúla a thionscnamh chun an t-airgead atá dlite a aisghabháil. Tugtar éileamh fiachais a dhéanamh air seo. Chun tuilleadh eolais a fháil maidir le héilimh fiachais, féach an roinn thíos.
D’fhéadfadh cúrsaí dlí shibhialta a bheith casta agus mar sin ba cheart duit smaoineamh ar chomhairle dlí a lorg.
Cad is Éileamh Fiachais ann?
Is próiseas dlíthiúil é éileamh fiachais inar féidir le creidiúnaí aisíocaíocht nó aisghabháil airgid atá dlite ag an bhféichiúnaí a éileamh.
Ní mór an t-éileamh fiachais a bheith le haghaidh méid sonrach airgid. Mar shampla, is féidir an t-éileamh a dhéanamh ar shonrasc neamhíoctha le haghaidh earraí a sholáthraítear nó seirbhís a sholáthraítear, nó ar iasacht neamhíoctha.
Cá mbíonn Éilimh Fiachais pléite?
Is minic a chinneann méid an éilimh ar fhiachas an chúirt inar féidir le duine imeachtaí dlíthiúla a thionscnamh. Tá trí dhlínse in Éirinn – an Chúirt Dúiche, an Chúirt Chuarda agus an Ard-Chúirt. Éistear formhór na n-éileamh fiachais sa Chúirt Dúiche nó sa Chúirt Chuarda.
B'fhéidir gur mhaith leat smaoineamh ar chomhairle dlí agus airgeadais a lorg chun tuiscint níos fearr a fháil ar a bhfuil i gceist. B'fhéidir gur mhaith leat freisin breithniú a dhéanamh ar ionadaíocht dhlíthiúil a bheith agat sa chúirt maidir le d'éileamh fiachais. Tabhair faoi deara le do thoil gur féidir go ngearrfar táillí ort as na seirbhísí seo. Chun tuilleadh eolais a fháil, féach ar ár leathanach comhairle dlí agus idirghabhála.
Tuilleadh eolais maidir le conas éileamh fiachais a dhéanamh.
